Latest News
My latest ramblings.
Enjoy! I definitely got important things to say
Joekskepèl Schots en Scheif
is opgerich in april 1975, toen eine gas voetballers van Venlosche Boys met de vastelaovend kinnis hadde gemak met ’t fenomeen joekskepèl. Zeej dóchte det aste.. [Laes vaerder]
Eierloup
Paoszaoterdaag meuge weej de deilnemers aan d’n eierloup van muzikale klanke veurzeen (zoeëlang as we de noeëte weite te rake
). D’n eierloup is eine kroegetoch in Venlo waobeej de deilnemers minstes 7 van de 13 deilnemende kroege langs gaon met ein rauw ei en ein stempelkaart. In elke kroeg kriege de deilnemers ein shotje te drinke, maar waal ónder de veurwaarde det ’t ei alik is. Wae nao aafloup nog steeds ein alik ei haet, krieg ein verrassing. Weej laote ós verrasse!
Vastelaovend 2016
Aafgeloupe oet
Ouk de verlenging zit d’r op. Taege alle verwachtinge in leet ’t waer ós neet in de steek en kóste we zellufs nog hiel efkes genete van ’t zunke in d’n halfvaste optoch door ’t stedje van Lol en Plezeer. De kerskes van ’t Jocus Dreejspan 2016 hebbe dus waal gebaat. D’r stónde vuuël minse naeve de kant en ouk de stumming zoot d’r bes waal in. Noow kinne de vastelaovespekskes weer in de kas en gaon we ós weer bezig halde met andere evenemente die in de loup van ’t jaor de revue passére. Klik heej veur de halfvastefoto’s.
Vastelaovend in de verlenging
De Vastelaovesbuuje hebbe d’r veur gezörg det de Vastelaovend in de verlenging geit, maar ’t kump good! Op zóndaag 6 maart trek d’n optoch alsnog door de straote van ’t Stedje van Lol en Plezeer. ’t groeëtste deil van ós programma is gewoeën doorgegaon. De Vastelaovesdaag begóste veur ós op dónderdaag beej de Altweiber in Kólle en woorte aafgeslaote met ein vet feesje in d’n Hoonderstal. Foto’s kint geej heej bekièke en ein filmke van de JoekskepelleParade heej.
De waeke veur Vastelaovend
Noow de Vastelaovend op ’t punt van beginne steit kinne we alves truuk kièke op ós belaefenisse in de waeke veur Vastelaovend. Wie kinse det baeter doon dan met foto’s en filmkes. Daorum klik heej veur de foto’s en heej of heej veur ein filmke beej de Altweiber in Kölle.
Vastelaovend
Ein korte vastelaovesperiode is aangebraoke, maar zoeëas ’t motto van Jocus zaet: “Kump Good”. Dao halde weej ós dan maar aan vas. Via de Vogelhut, Straole en Kölle duike we begin fibberwari de dreej dolle daag in. Wellich zeen we ós heej of dao in ’t Stedje van Lol en Plezeer en kinne we óg plezeere met ein leuk stökske meziek. Weej zien d’r klaor veur, dus wae wet …..
Met Sinterklaos naor Uerdingen
Ein tradisie die neet mier weg te dinke velt oèt ’t programma van Sinterklaos: op bezeuk gaon in partnerstad Kreifeld-Uerdingen. Ouk dit jaor weer woort d’r koers gezatte richting Pruuses. Naodet we lekker gegaete hadde en geschmienk ware, op naor de binnestad wao de minse Sinterklaos al stónde op te wachte. Nao aafloup stónd d’r in ’t Rathaus ein neutje klaor. Nao ’t aafschmienke en veurdet de bus ós weer naor hoes brach, woorte d’r nog inkele (muzikale) eurkes doorgebrach beej stamkroeg Zur Krone.
Merchandise
’t nieje vastelaovesseizoen is weer aangebraoke. Tied um wat aan ózze merchandise te doon. Veur de pries van slechs € 2 kint geej eine moeëje pin koupe veur op ógge vastelaovesoutfit. Ein ander pekske meug netuurlik ouk! As geej wilt krieg ge d’r ouk nog eine Schots en Scheif sticker beej. De pins zien te koup beej de leje van de joekskepèl.
Wienfeeste 2015 in Rheinbrohl
Netuurlik waas ’t ouk dit jaor weer fees in Rheinbrohl. Nao wat vertraoging hadde we vriedaag zoeë rónd de klok van half zeve beej Dietmar ós ierste (en zeker neet ós letste) pilske te pakke. Daonao ós slaopplaatse in orde gemak en op naor de Römerplatz, wao we ondanks det ’t fris waas, inkele eurkes meziek hebbe gemak. Daonao weer de kroeg in, waonao ’t veur inkele ónder ós laat (of vruug asse wils) is gewaore. Nao ein prima ontbijt, klaorgemak door Jürgen en Klaus, waas ’t tied um te gaon scheete. D’n “adler” waas gevlaoge, dus maar op schiefkes. Luc waas ózze Schützenkönig met as gooje 2e en 3e Jean-Pierre en Marc. Veur dees prestasie woorte zeej zóndaag op de Römerplatz nog in ’t zunke gezatte. Zaoterdaagmiddaag beej de Wienkeunegin op bezeuk en daonao met de keunegin naor de Römerplatz. Ut waas d’r good vol en de stumming zoot d’r in. Laat op d’n aovend hebbe we same met ’t geweldige orkes Erste Sahne as aafsloeëting Atemlos gedaon. De arrangemente bleke neet ’t zelfde maar ’t kwaam toch weer good ( klik heej veur ’t filmke ) Op zóndaag waas ’t nao ’t ontbijt tied veur ’t bezeuk aan ’t Altersheim. De aldere oet Rheinbrohl genoote d’r van. Zoeëas altied woort ’t waekind aafgeslaote op de Römerplatz. We kieke met vuuël plezeer truuk, met dank aan de HVV Rheinbrohl veur de organisasie!
Klik heej veur de Foto’s
Wienfees in Rheinbrohl
De daag waere korter, aaf en toe liék ’t al ein bietje herfs, maar waerman Piet belaof ós good waerke as weej van 2 wies 4 oktober ós óndertösse tradisjonele oètstepke naor de Wienfeeste in Rheinbrohl gaon make. Weej hebbe d’r zin in en we weite noow al det we door de HVV Rheinbrohl met aope erm waere óntvange. Weej verheuge ós d’r al op door gashier Jürgen in de watte te waere gelag. Laot gaon, laot gaon!