Det waas Vastelaovend 2022
Óndanks alle Corona toestande hebbe we toch nog de Vastelaovend 2022 kinne viere. Noow zit ’t d’r weer op en kinne we d’r weer ein jaor op tére. Kiek veur foto’s en video’s van ós belaefenisse op de foto– en videopagina.
ós Vastelaovesoptraejes
Met Vastelaovend vindt geej ós (ónder andere) op de volgende lokasies:
- vriedaag veur Vastelaovend: vanaaf 20.00 oor Hotel Bok op de Parade
- vastelaoveszóndaag: vanaaf 13.00 oor tiédes en nao de kinderoptoch Hotel Bok op de Parade
- vastelaovesmaondaag: vanaaf 14.00 oor Hotel Bok op de Parade
- boerebroelofsdinsdaag: vanaaf 14.30 oor beej of in de buurt van Jocus Hoonderstal de Maaspaort.
En we houwe op de kis……
’t geit d’r dan toch nog van kómme! We kinne Vastelaovend viere!!! Nao ein Corona pauze van 2 jaor meuge we weer. D’r zien al inkele aanvraoge binne. Interesse um Schots en Scheif op bezeuk te kriege? Laot efkes wat weite via de kontakpagina en we kieke wat meugelik is.
Zoel ’t dan toch???
Zoele we in de kómmende maond toch nog efkes met óg same op de ein of ander meneer Vastelaovend kinne viere? Weej hebbe Sjakie in idder geval beej ós en we kinne dan same rap aan d’n tap met ein drópke raki (ein glaeske beer meug netuurlik ouk), genete van de meziek van de Sirtaki. Wat zoel ’t mieters zien!!
Fijne kersdaag en ein spetterend en gezónd 2022!
Helaas smiet Corona ouk noow weer roet in ’t aete. Veur de Vastelaovend zuut ’t d’r erg slech oet, maar laote we haope det d’r toch nog iets te viere velt taege daen tied. Weej winse óg in idder geval allemaol fijne kersdaag en ein spetterend en baovenal gezónd 2022! Det we ós maar weer gauw ónder normale umstandighede meuge treffe!
Boeremoos paote
Nao ein jaor wachte weer kinne ruuke aan de echte Venlose Boerebroelof: boeremoos paote met ’t Boerebroelofsgezelschap 2022 Zomerparkfeest
Iérste rippetisie nao Corona
Jaaaa…., we meuge weer! Dinsdaagaovend 8-6-2021 de iérste rippetisie nao eine lange Corona stop. Nao zónne lange tiéd velt det neet mei, maar de iérste toeëne zien weer geproduceerd 😅
We zeuke euveriges nog versterking in ’t zwaor koper. Hesse interesse meld dich dan via ’t kontakformulier op dees website.
Leon Versteilen beneump tot lid in de Orde van Oranje-Nassau
Ôzze eige veurzitter en taeves penningmeister Leon Versteilen is vandaag door börgervader Antoin Scholten telefonisch verras. Leon is namelik beneump tot Lid in de Orde van Oranje-Nassau. Iets waor weej as Joekskepèl Schots en Scheif netuurlik hiél erg grueëts op zien.
Leon is behalve ierelid, muzikaal leider, veurzitter en penningmeister van Schots en Scheif auk al sinds de beginjaore sevetig aktief vreejwilliger beej Venlosche Boys. Iérs as leider van de jeug en later o.a. as lid van toernooikemmissie en lid van de kantinecommissie. Taegewoordig verzörg hae de leje-administratie en de ICT in de kantine. Sinds 2017 is hae auk nog penningmeister van het collecte-comité Groot Venlo van ut Fonds Gehandicaptensport.
Leon, names alle jônges en maedjes van Schots en Scheif van herte perfisia!!! Dien beneuming is miér dan terech en ’t is dich van herte gegund! Weej haope desse nog vuuël jaore aktief meugs bliéve beej ôs joekskepèl!
Corolaovend 2021
Helaas kinne we dit jaor neet de Vastelaovend viére zoeëas we det gaer zoele wille. Haopelik leet dees verschrikkelikke Corona pandemie gauw achter ós en kinne we veuroét kiéke nao eine normale Vastelaovend 2022. Veurluipig zit d’r niks anders op dan truuk te kiéke in d’n tiéd en te genete van detgene wat we in de loup van de jaore hebbe meigemak. Halt daoveur veural Facebook, Instagram, Twitter en YouTube in de gate. We zulle regelmaotig ’t ein en ander deile met óg. Kiék beejveurbeeld ens heej