Vastelaovend 2018 leet weer achter ós. ’t waas ós gegaeve um weer ein aantal moeje optraejes te meuge belaeve. Begós beej ’t Boeremoosbal in Jocus Hoonderstal, via ein aantal schoeëne optraejes ónder andere euver de päöl in Kreifeld, oétintelik weer truuk gekómme in Jocus Hoonderstal um dao de Vastelaovend aaf te sloete. Um de herinneringe vas te halde heej de foto’s. Ouk zien d’r inkele filmkes gemak. Klik daoveur heej.
D’n dónderdaag veur de Vastelaovend is tradisjoneel d’n daag det we met de Deutsche Bahn naor Kölle gaon. Aanvankelik ware d’r sómbere berichte euver ’t weer. Bleek det mei te valle! We kóste zelfs beej ein lekker zunke boete optraeje. Ouk de Zug deej ’t op d’n truukwaeg redelik. Maar ein half eurke vertraoging. Det is waal ens anders gewaes!
’t waekind veur Vastelaovend brach de bus ós 2 kièr euver de päöl, en waal 2 kièr naor Kreifeld. Vriedaag waas d’n daag van die Damensitzung van KG Grün-Weiss Grönland 1957 e.V. Krefeld en op zaoterdag ware we op de Kostümsitzung van Gesellschaft 1938 Krefeld-Oppum e.V. Allebei de daag ware de meujte waerd, met vuuël joeks en jen. Filmke Damensitzung, filmke Kostümsitzung.
Wat duisse asse ’t verzeuk kriegs um ozze beermeister van de wienfeeste, Willy aus Rheinbrohl, te felicitére met ziene 60-ste verjäördaag en d’n aafstand is te groeët um dao efkes nao toe te gaon. Dan steurse um eine video waorin de baodschap wuurt euver gebrach. Kiek heejónder wie det ging.
.
Zoeë vlak veur vastelaovend hebbe weej ós website nog maar ens in ein niej jeske gestaoke. De site mót noow op alle apparate (pc, laptop, tablet, telefoon) good laesbaar zeen. Neem gerös efkes den tiéd om rónd te kieke.
Elf van Elf sprik vanzelf, kump ‘nnen joeksigen tied. Jao ’t begint alweer te kriebele! Op d’n elfde van d’n elfde brink de bus ós in d’n aovend naor Willich, wao we de Karnevalseröffnung des Festausschuss Willicher Karneval meuge opluustere. As de feesdaag veurbeej zien dan geit dae vastelaovestrein ech rieje. Haopelik is ’t ôs gegaeve en wuurt ’t zoeëwaal in ós eige Stedje van Lol en Plezeer as euver de päöl weer net zó’n fantasties fees as veurig jaor.
Dit jaor waas ’t toch waal ein biezónder jaor in Rheinbrohl. Det begós op vriedaag toen we veur d’n ierste kier meideeje aan ’t Fussbalturnier van de FV Rheinbrohl. Nao penantie scheete um de 3e en 4 plaats haolde we de 4. Platz (d’r waas nog effe ein discussie of de coach óntslage meus waere). Daonao woort d’n ammezuur dae nog euver waas oetgeblaoze op de Römerpatz. De Zaoterdaag begós naat en vóchtig maar taege d’n aovend woort ’t druug en kóste we ós oetlaeve beej de Wienkeunegin en daonao op de Römerplatz. Ouk de zóndaag had weer ein spesjaal tintje. We hadde de ier um de äöpening van ’t nieje Camille-Coupil_park door de börgervaders van Rheinbrohl en partnergemeinte Boercefrance-le-Chapus te meuge opluustere. We kinne d’r ouk nog euver naodinke of we in juni 2018 twieë daag nao Frankriek wille um dao ein feesje op te luustere. ’t blief toch waal biezónder um elk jaor opniej weer de waardering en wermte in Rheinbrohl te veule.
Klik heej veur de foto’s.
De wienfeeste staon weer veur de deur. Op 29 september gaon we truuk, truuk, truuk nao Rheinbrohl. Zoeëas ´t d’r noow oetzuut hove we dit jaor neet te schete (tenminste neet met keugel), maar kinne we ós krachte maete op de greune plak. We zien Turnier Teilnehmer beej de plaatselikke voetbalklup. D’r steit dus eine echte Duitsland-Nederland op ’t programma. Kinne we intelik ens wat rechzette (of neet neteurlik). Daonaeve besteit dit waekind zeker ouk oet ’t muzikaal vermake van de bezeukers van de wienfeeste (en ouk ószelf).
Update: In verband met de verschrikkelijke gebeurtenis beej VenloStormt, hebbe weej beslaote ós optraeje op de Mert beej ’t stadhoes neet door te laote gaon. We winse femilie, vrinde, bekinde en de organisasie van VenloStormt vuuël sterkter.
—————————————————————————–
Veur de zomerpauze struie we nog eine kier ós muzikale klanke oet euver ’t publiek en waal op zóndaag 11 juni um 14.00 oor en um 15.30 oor beej VenloStormt op de Mert in Venlo. Daonao gaon we genete van de zomervekansie, waonao we op 29 augustus d’n draod weer oppakke um ós te gaon veurbereide op de wienfeeste.
Paoszaoterdaag 15 april vindt weer de jaorlikse Eierloup plaats in de kefee’s in hertje Venlo. Kiéke wae d’r in slaag de eier hièl te halde. Weej laote det gaer aan óg euver, maar zulle waal veur muzikale óndersteuning zörge.
