Wat hebbe weej ein geweldig jubileumfees meuge belaeve en wat waas ’t waer ós good gezind! Naodet we beej Brouwersplaats hadde genaote van koffie of wat anders met of zónder alcohol en ein lekker stökske vlaai waas ’t tied um eine róndgank door de binnestad te make. Aan publieke belangstelling gen gebrek op deze zaoterdaag. Daonao truuk naor Brouwersplaats um te genete van ein hepke en ein drenkske. Ós vrouwe wiste ós te verrasse met veur alle muzikante as herinnering aan dit jubileum ein leuk borrelplenkske met ’t logo van Schots en Scheif d’r op. Óndertösse hadde ós vrinde en vrindinne oét Rheinbrohl ós ouk gevónde en zeej hadde ein paar passende kado’s veur ós in petto. De feescommissie noom de gelaegenheid te baat um de 50-jäörige jubilarisse Aloys, Sef en Leon in ’t zunke te zette en eur te veurzeen van ’t tradisjionele jubileumspeldje. Daonao waas ’t genete van ein heerlik buffet en woort d’r nog eine gezellige aovend aan vasgeknuip. Heej staon de foto’s en heejónder 2 video’s. Op nao ’t joeksige aantal van 55 jaor Schots en Scheif!
