Rös zaach Niels!

Neet te bevatte, met stómheid geslage. Niels, dich waas nog neet zoeë hiél lang d’r beej, maar binne de kortste kiere waas dich d’r eine van ós!

2 waeke geleje hebbe we nog geproos op diene verjäördaag.

Dich woels naeve ’t zinge gaer ’t slaagwerk gaon versterke, dus kwaam d’r ein half deepe tróm beej diese zelf hebs opgepimp maar waose maar 2 waeke van haes kinne genete. Ouk zoots dich al vol ideeje um ózze vastelaoveswage opniej aan te kleije.
Aafgeloupe dinsdaag steursde dich um 6.46 oor ein appje met de teks “ik mót mich veur vanaovend aafmelde”. Wae had kinne bedinke det det dien letste berich zoel waere. Óngeluif, verdreet, verbijstering en nog hiél vuuël mier geveules die neet in wäörd zien oét te drökke hebbe zich van ós meister gemak.

Noow bisse beej diene pap. Weej halde dich in gedachte zoeë wiese waars, eine geweldige vent dae hielemaol in ós klupke pasde.

Niels rös zaach!